7 ಲಕ್ಷ ಆಸ್ತಿಗಳಿಗಿಲ್ಲ ಎ-ಬಿ ಖಾತಾ ಬಿಬಿಎಂಪಿಗೆ ಹೊಸ ತಲೆನೋವು

ಬೆಂಗಳೂರು: ಸಿಲಿಕಾನ್ ಸಿಟಿಯಲ್ಲಿ ಆಸ್ತಿಗಳ ನಕಲಿ ದಾಖಲಾತಿ, ರಿಯಲ್ ಎಸ್ಟೇಟ್ ಮಾಫಿಯಾಗೆ ಕಡಿವಾಣ ಹಾಕಲು ಹೊಸ ಹೊಸ ಕ್ರಮಕ್ಕೆ ಬಿಬಿಎಂಪಿ ಮುಂದಾಗಿದೆ. ಹಾಗಾಗಿಯೇ ನಿವೇಶನ, ಆಸ್ತಿ ಖಾತೆಗಳ ಗೊಂದಲ ಬಗೆಹರಿಸಲು ಪಾಲಿಕೆ ಇ-ಖಾತಾ ಯೋಜನೆ ಜಾರಿ ಮಾಡಿದೆ. ಆದರೀಗ ಬಿಬಿಎಂಪಿಗೆ ಮತ್ತೊಂದು ತಲೆನೋವು ಶುರುವಾಗಿದೆ.

ಹೌದು. ಮಹಾನಗರ ಬೆಂಗಳೂರಿನಲ್ಲಿ ಆಸ್ತಿಗಳ ನಕಲಿ ದಾಖಲಾತಿ, ರಿಯಲ್ ಎಸ್ಟೇಟ್ ಮಾಫಿಯಾಗೆ ಕಡಿವಾಣ ಸೇರಿದಂತೆ ನಿವೇಶನ, ಆಸ್ತಿಗಳ ಗೊಂದಲಗಳಿಗೆ ತೆರೆ ಎಳೆಯಲು ಪಾಲಿಕೆ ಇ-ಖಾತಾ ಯೋಜನೆ ಜಾರಿಗೊಳಿಸಿದೆ. ಕಳೆದ 2-3 ತಿಂಗಳಿಂದ ಇ-ಖಾತಾ ಪಡೆಯಲು ಆಸ್ತಿ ಮಾಲೀಕರಿಗೆ ಅವಕಾಶವನ್ನೂ ಮಾಡಿಕೊಡಲಾಗಿದೆ. ಈ ನಡುವೆ ನಗರದಲ್ಲಿ 7 ಲಕ್ಷ ಆಸ್ತಿಗಳಿಗೆ ಎ ಅಥವಾ ಬಿ ಖಾತಾ ಇಲ್ಲದಿರುವುದು ಬೆಳಕಿಗೆ ಬಂದಿದೆ. ಇದು ಬಿಬಿಎಂಪಿ ಅಧಿಕಾರಿಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.

ಹೌದು. ಸುಮಾರು 7 ಲಕ್ಷ ಆಸ್ತಿಗಳಿಗೆ ಯಾವುದೇ ದಾಖಲಾತಿಗಳು ಇಲ್ಲವಂತೆ. ಇಂಥಾ ಆಸ್ತಿಗಳಿಗೆ ಈಗ ಹೇಗೆ ಇ-ಖಾತಾ ನೀಡುವುದು ಎನ್ನುವುದೇ ಮತ್ತೊಂದು ಸಮಸ್ಯೆ. ಪಾಲಿಕೆ 22 ಲಕ್ಷ ಡ್ರಾಫ್ಟ್ ಅನ್ನು ಆನ್‌ಲೈನ್‌ಗೆ ಅಪ್ಲೋಡ್ ಮಾಡಿದೆ. ಆದ್ರೆ ಒಂದೇ ಸರ್ವೇ ನಂಬರ್ ಹಾಗೂ ಒಂದೇ ಖಾತೆಯ ಆಸ್ತಿಗಳಿಗೆ ಇಬ್ಬರು-ಮೂವರು ಮಾಲೀಕರೆಂದು ಹೇಳಿಕೊಳ್ಳುವವರಿಂದ ಅರ್ಜಿಗಳು ಪಾಲಿಕೆಗೆ ಬಂದಿದೆ.

ಈ ಎಲ್ಲ ಬೆಳವಣಿಗೆಯಿಂದ ಇ-ಖಾತಾ ಹಂಚಿಕೆಗೆ ದೊಡ್ಡ ತೊಡಕಾಗಿದೆ. ಇದು ಪಾಲಿಕೆಯ ತಳಮಟ್ಟದ ಕಂದಾಯ ಅಧಿಕಾರಿಗಳ ಲಂಚಬಾಕತನದಿಂದ ಆಗಿರುವ ಸಮಸ್ಯೆ ಎನ್ನುವುದು ಸಾರ್ವಜನಿಕರ ಆರೋಪ.